Løp og kjøp!

Du har kanskje sett slike plakatar før? Men, har du tenkt over kvifor dei næringsdrivande marknadsfører sal i ein kort periode, kvifor ein påverkar gir ut ein «eksklusiv rabatt» til berre følgerane sine, eller kvifor ein næringsdrivande vel å gi bort eit produkt gratis dersom du nyttar deg av dagens tilbod om å «ta 3 betal for 2»?  

Først og fremst er det fordi slik reklame er verknadsfull og gir inntrykk av at du sparer pengar dersom du handlar fort. I tillegg gir slik reklame ofte inntrykk av å berre gjelde for eit fåtal personar, noko som gjer at det er lett å oppfatte tilbodet som unikt.  

Det blir brukt mange forskjellige verkemiddel i reklame for å få deg til å handle raskt. Eksempel på slike verkemiddel er «kor mange som ser på eit produkt», «klokke som tel ned», eller at tilbodet berre gjeld «så langt varelageret rekk». Slike verkemiddel i reklame skaper inntrykk av at produktet er ettertrakta, og at det gjeld å vere rask om du òg ønsker å nytte deg av det. Men her er det viktig å vere ein medviten forbrukar fordi det ofte er vilkår for å nytte seg av tilbodet. Vilkåra blir gjerne presentert i ei stjerne, og det er derfor viktig at du set deg nøye inn i tilbodet slik at du ikkje blir lurt!