Kva er reklame?
Reklame er betalt kommunikasjon om ei vare eller teneste. Det betyr at nokon tener pengar på å fortelje om akkurat dette produktet.
Reklame handlar om å vise fram eller fortelje om eit produkt på ein måte som gjer at flest mogleg får vite om det. Målet er å skape interesse og merksemd rundt produktet. Slik kan reklamen bidra til at flest mogleg kjøper akkurat dette produktet.
Reklamen fortel gjerne om produktet og kor bra det er. Men dei som lagar reklame kan bruke mange forskjellige verkemiddel for å påverke folk sine tankar, haldningar og handlingar. Både ord, bilde, lyd, lys, musikk og tekst kan vere med på å påverke kva vi tenkjer og føler, kva vi gjer, og kva vi kjøper.
Oppgave: Kjenner du igjen reklamen?
Sjølv om reklame stort sett har det same målet, treng ikkje all reklame sjå lik ut. Tvert imot! Det finst tallause former for reklame: Reklamefilm, plakatar, banner, radioreklame, tilbodsaviser og reklameinnlegg i sosiale medium er berre nokre av dei.
Reklame kjem altså i alle moglege former. Det er slett ikkje alltid like lett å kjenne igjen reklame, sjølv om du ser han føre deg.